Mae busnesau bach ein trefi Cymreig mor bwysig… 

Brwydr feunyddiol ein busnesau bach yng Nghymru 

BARN gan Gruffydd Evans a Tomos Jones,  Blwyddyn 10, Ysgol Glan Clwyd

Fel y gwelwn yn fwy ac yn fwy aml y dyddiau hyn mae cwmnïau mawr yn symud i drefi bach.  

Er bod nifer yn credu bod hyn yn beth cadarnhaol ac yn helpu trefi, yn ein barn ni pan edrychwn yn fanylach gwelwn yr effaith negyddol gall y busnesau hyn weithiau gael. 

Wrth i ni ystyried ein bod ni yng nghanol cyfnod economaidd anodd ym Mhrydain mae hyn hefyd yn ei gwneud hi’n anodd i gwmnïau bach i oroesi. Mae busnesau bach fel hyn yn hanfodol bwysig i dref fel Dinbych, mae’n siapio’r dref ac yn un o’r pethau sydd yn gwneud ein trefi yn unigryw ac yn arbennig. 

Mae’r cyfraniad mae’r busnesau bach lleol yn ei wneud i unrhyw gymuned yn hynod  bwysig a rhywbeth hwyrach na fyddai’r busnesau mawr yn debygol o ystyried. 

Enghreifftiau o hyn a welwn yn aml yw pethau fel nawdd i dimau chwaraeon lleol. Mae hyn yn sicrhau bod pob plentyn a pherson ifanc yn cael cymryd rhan mewn ystod eang o chwaraeon. Tybed a fyddai busnesau mawr y wlad yn ystyried cefnogi timau bach lleol yn yr un ffordd? 

Yn sicr mae angen i ni amddiffyn ein busnesau lleol ymhob ffordd y gallwn.  

Rhaid cofio bod llawer ohonynt yn cael eu cadw gan bobl sy’n byw yn y gymuned wrth reswm.

Pobl rydyn ni yn ei adnabod, sydd â chysylltiadau â thîm pêl-droed neu dîm rygbi lleol ac sydd eisiau cefnogi cymaint ag sydd bosib a chreu eto’r cyfleoedd y cawson nhw pan oeddent yn blant.  

Mae’r bobl yma eisiau’r gorau i’r genhedlaeth leol nesaf. Anodd weithiau yw gweld  y busnesau mawr yn rhannu’r un meddylfryd. Yn naturiol mae eu blaenoriaethau yn wahanol ai prif bwrpas yw creu arian yw cwmni enfawr. 

Gyda’r busnesau mawr hyn yn mewnfudo i drefi bach maent yn achosi cystadleuaeth i’r busnesau bach ac o ganlyniad, yn ei gwneud hi’n anodd iawn iddynt barhau. 

A all y  busnesau mawr hefyd gael dylanwad negyddol ar y stryd fawr yn yr ardal? 

Mae trefi marchnad  yn hanesyddol ac fel arfer mae cyfle i bobl gwrdd â chymdeithasu ar y stryd wrth siopa.  

A oes yr un ymdeimlad wrth siopa mewn un man yn unig? Yn ein barn ni mae’n lleihau’r ymdeimlad o gymuned.  

Pawb i’w farn wrth gwrs ond – ynghyd a’r manteision amlwg – mae’n bwysig ystyried yr anfanteision ehangach sy’n gysylltiedig â busnesau mawr yn symud i mewn i ardal leol.