Ydyn ni ’di dod at yn hun eto tybed?… noson i’w thrysori

gan Deio Edwards

Wrecsam 2 – 4 Chelsea

Ia wir, ella bod taith Wrecsam yng nghwpan FA  ar ben erbyn hyn, ond does dim amheuaeth bydd atgofion am y noson hon yn parhau.

Ac os oes angen tystiolaeth fod gêm yn fwy na’r chwiban cyntaf tan chwiban olaf y dyfarnwr, wel hei, dyma’r enghraifft gora ffeindiwch chi.

Ddechreuodd y cyffro ar gyfer y gêm rhwng Wrecsam a Chelsea yn pumed rownd Cwpan FA, bron wythnos cynharach, wrth i bawb a’i deulu a ffrindiau syllu ar eu sgriniau, yn brysio’n wyllt i brynu’r tocynnau mwyaf poblogaidd yn y DU.

Ac erbyn diwrnod y gêm fawr, roedd cannoedd heb docyn mor awyddus i gael blas o’r awyrgylch, (ac ambell ddiodyn hefyd!) wedi penderfynu ymuno gyda’r fyddin goch, gwylio’r gêm yn un o’r tafarndai, ac aros mewn gwesty.

Wir i chi, ar achlysur arbennig fel hyn, dwi’n diolch i’r nefoedd fy mod i dal hefo’r synhwyrau gweledol a chlyw… bloedd y dorf yn canu’n uchel ei gloch ar gyfer yr hen Joey, crysau a baneri coch a gwyn yn chwifio, neidio a dawnsio – drama pur oddi ar y cae, ac ar y cae…

Smith yn carlamu fel milgi a slotio Wrecsam ar y blaen, cyn i Okonkwo druan sgorio’n yn ei gôl ei hun i Chelsea.

Doyle wedyn yn rhoi Wrecsam yn ôl ar y blaen a’r fyddin goch yn cyffwrdd y nefoedd… tan i Acheampong rhwydo’n hwyr i Chelsea.

Hei, peidiwch rhannu’r stori yma hefo Steven Spielberg, neu bydd o’n cael syniadau ar gyfer ffilm.. ond, stori wir o ddramatig ddatblygodd ar y Stök Cae Ras, wrth i Dobson dderbyn cerdyn melyn gan y dyfarnwr… ond roedd swyddogion VAR yn anghytuno, a Dobson yn gweld y cerdyn coch, ac o ganlyniad y dorf gartref yn gweld  niwl coch!!

Beth bynnag, dihiryn pantomeim, Garnacho, yn taro Chelsea ar y blaen, cyn i Brunt gyfartalu’n ddramatig i Wrecsam yn y munudau olaf… dim ond i VAR ddiystyru’r gôl am fod offside!

Yn greulon i Wrecsam, sgoriodd Pedro i orffen y gêm. Ond fe ddangosodd dinas a chlwb pêl droed Wrecsam falchder ac ysbryd i fod yn falch iawn ohono.